Dul-an 30 ka mga pamilya ang naapektuhan sa sunog nga nahitabo sa San Isidro Labrador, Barangay Lapasan ning syudad pasado ala una kagahapon sa hapon.
Upat ka balay ang nasunog nga gipanag-iyahan nilang Nieva Bagares, Ethel Cainoy, Sohaily Diron ug Nademso Virtudazo.
Nasayran nga 20 ka pamilya ang nagrenta sa balay ni Diron, usa kang Bagares, upat ka pamilya kang Cainoy ug duha ka pamilya ang nagrenta sa balay ni Virtudazo.
Ang mga apektadong pamilya ang temporaryong nagpuyo karon sa covered court sa Barangay Lapasan.
Sa imbestigasyon sa Bureau of Fire Protection pinaagi ni SFO2 Imelda Barrazan nga problema sa electrical wiring ang nakita nilang hinungdan sa sunog nga nagsugod sa ikaduhang andana sa balay ni Diron ug daling mikaylap sa abay nga mga balay.
Mokabat usab sa sien mil ang bana-banang damyos sa sunog.
