Aprobado na niaging adlaw nga Martes atol sa regular sesyon sa Sangguniang Panlalawigan ang Dos Milyones ka pesos (P2M) nga dungag pondo aron mas munindot pa ang pagsaulog sa ika-kinse (15) nga MunaTo Festival og ika-baynte singko (25) nga foundation anniversary sa Sarangani Province mahitabo karon ng Nobyembre baynte-otso (28) paingon Disyembre uno (1).
Segun ni Board Member Bobot Martinez, chairman sa komitiba sa finance, ang Dos Milyones ang maoy mudungag sa kasamtangag pondo nga P2.4 Milyon ka pesos, suma total P4.4 Milyon ang kinatibuk-ang pagagamiton.
Ang pagka-aproba sa dungag nga pondo ang gikalipay ni Board Member Rosemarie Martinez-Sayo, chairperson sa komitiba sa turismo og maoy gituboy ni Governor Steve Chiongbian Solon nga chairperson sa MunaTo Festival 2017. Gipasalamatan niini ang gobernador sa pagpangitag pondo aron musadya pa ang silver anniversary sa Sarangani.
Dungag ni Board Member Sayo, mas bongga nga selebrasyon ang lauman sa mga katawhan. Og lauman usab matud pa ang mga pinasahi nga programa. Mas gipangandaman ang Foundersā Night mag-ila sa pinakaunang provincial og municipal officials lakip na mga empleyado sa Sarangani Province human sa pagsiak niini sa lalawigan sa South Cotabato, gidumalahan kaniadto sa mga apuhan ni Governor Solon nga sila kanhing congressman James Lee Chiongbian og kanhing gobernadora Prescilla Lopong Chiongbian.
Dagko unya ang mamahimong premyo sa street dancing nga gi-sponsoran ni Senador Manny Pacquiao, diin gibansagan kining ābattle of championsā tungod kay maglaban-laban ang mga kampyon sa street dancing sa pito ka munisipyo sa Sarangani.
Anaa pud si Congressman Ruel Pacquiao nga maoy sponsor sa MunaTo Concert dala ang sikat nga mga banda gikan pa sa kauluhang Maynila.
Sa bahin ni Langlang Purisima, ang tourism officer ilalum sa STIPC kon Sarangani Tourism and Investment Promotion Center, standing instruction matud pa ni Governor Solon ngadto kanila inabagan nila Vice Governor Elmer De Peralta og mga board member, nga i-prayoridad sa mga aktibidad sa MunaTo ang mga katawhan gikan sa pito ka lungsod og ang pag-ila sa mga pioneer nga maoy nagsugod og nag-ugmad sa Sarangani Province.
Pagsugod pa lang sa probinsya tuig 1992, nakaangkon dayon kini og sementado og aspaltado nga national highway gikan Glan paingon Maitum lahos na sa Malungon, nindot nga Kapitolyo og mga munisipyo, mga eskwelahan, og daghan pang proyekto.
