Davao City- Nakaangkon og samad dinunggaban ang usa ka lalaki nga nagpaila nga si Paulo Solang Cruz, 32 anyos, minyo nga taga-Isla Verde Barangay 23-C Piapi Boulevard ning syudad.
Sumala sa report sa Sta. Ana PNP, samtang ang biktima nagbaktas sa dalang Marikit sa gihisgutang barangay, kalit lamang siya giduol sa tulo ka mga suspetsado ug gitabangan og kulata.
Usa sa mga suspek giila nga si Mark Rizaldo Ayola, 26 anyos, ulitawo ug usa ka helper sa durian vendor diha sa may Magsaysay Park kalit lamang gi-dunggab ang biktima gamit ang hinagiban nga pang abli og durian hinungdan sa pagkasamad sa biktima sa wala nga parte sa iyang dughan.
Tungod duol ra ang buhatan sa Sta. Ana PNP, narespondehan gilayon kini sa kapulisan resulta sa pagkasikop ni Ayola apan daling naka ikyas ang lain pang duha pa ka mga suspek.
Balhog na sa prisohan ang suspek samtang gidala na sa Southern Philippines Medical Center ang biktima sa pagpanunggab.
Kasamang Paul Canono
