DYHB RMN Bacolod nag-donate sang P2.5-M nga balor sang airtime para sa radio based instruction sang ALS-Negros Occidental

7

Kapin sa 2.5 milyones pesos nga balor sang airtime ang gindonar sang DYHB RMN Bacolod sa DepED province para sa Radio based instruction sang Alternative Learning System ukon ALS sa probinsya sang Negros Occidental.

Pormal na nga ginlagdaan kahapon, Oktubre 13, ang Memorandum of Agreement ukon MOA sang radio based instruction para sa ALS Learners sa probinsya sang Negros Occidental sang mga matag-as nga opisyales sang Department of Education Schools Division Offices of Negros Occidental, SDO Himamaylan City kag ni Dr. Jeony Bigay, station manager sang DYHB RMN Bacolod.

Ang ceremonial MOA signing ang ginsaksihan man sang pila ka representante sang tagsa ka Schools Division Offices kag sang mga empleyado sang DYHB Bacolod.

Ginpasalamatan ni Mr. Romeo C. Sison, Jr, ang kaalwan sang tagdumahalan sang sini nga waragwagan nga malab-ot sang DepEd ang ila nga handum nga mahatagan sang de kalidad nga edukasyon ang tanan nga estudyante sang Alternative Learning System ukon ALS.

Nagapati si Sison nga ang radyo isa sa gihapon ka powerful tool agud malab-ot nila ang ila sini nga mga learners ukon estudyante. Si Sison amo ang Chief sang School Governance and Operations Division ukon SGOD sang School Division Office of Negros Occidental.

Daku man ang pagdayaw ni Dr. Marsette D. Sabbaluca, CESO VI, Schools Division Supt., Negros Occidental sa DYHB RMN Bacolod bangud sa iya nahibalu-an nga tuman gale ka sangkad sang malab-utan sang signal sini. Para sa kay Dr. Sabbaluca, isa naman ini ka panibag-o nga panghangkat sa ila, sa diin sa new normal, ginbun-ag ang new breed kag brand of teachers. Padayon sila nga nagalaum nga mangin madinalag-on ang ini nga sahe sang modality. Kaangay man sini ang panugyan ni Mr. Reynaldo Gico, ang Schools Division Supt, SDO Himamaylan. Iya man sini ginpasalamatan kag gindayaw ang mga manunudlo nga tuman ka creative sa panibag-o nga panghangkat agud mahatagan sang maayu nga edukasyon ang mga estudyante.

Sa piyak nga bahin, ginkabig naman ni Bigay, nga isa ka pribilihiyo para sa RMN ang ini nga partnership. Ginpasalamatan man sini ang Dep-Ed Province of Negros Occidental sa pagpili sa istasyon nga mangin partner sa paghatag sang maayu kag de kalidad nga sahe sang edukasyon sa mga ALS learners. Ginalauman sini ang mas malawig pa nga partnership sa tunga sang Dep-Ed kag DYHB RMN Bacolod.




Ang radio based instructions sa tunga sang Schools Division of Himamaylan kag DYHB ang magalawig sang isa ka tuig ukon sa isa ka school year. Mabati-an ang programa kada alas 5-6 sang gallb-i, kada Sabado umpisa Oktubre 24, 2020.

[image: image.png]

Facebook Comments