Banga, Aklan — Uwa eon nakaabot pa nga buhi sa Provincial Hospital ro biktima it pagpamaril nga natabo ko Sabado it gabii ra sa Brgy. Sigcay, Banga, Aklan. Ro biktima ginkilaea kay Joshua Teodosio, 24 anyos samtang rong suspek nakilaea kay James Isturis, 30 anyos tana residente it nasambit nga barangay. Sa imbestigasyon it Banga PNP, naga guwa nga unang nakaangkon it uwa pagka intindihan rong daywa sa sangka birthday sa andang lugar ag para nga makalikaw sa gulo si James hay umuli eon lang raya. Mga alas onse rong gabii hay nagpanawag si Joshua kaibahan na ro anang igmanghod sa baeay ni James nga gustong makipag istorya parte sa natabo kanda sa birthdayhan apang pagbukas ni James hay sinueang sueang imaw it inumok ni Joshua. Bangud sa naimpito si James ag may sukbit raya nga baril sa hawak hay ana nga binuoe ag binaril si Joshua nga inigo sa dughan. Matapos rong insidente hay insigida man nga gindaea sa hospital ro biktima pero gin deklara raya nga dead on arrival it doktor. Nag surrender man sa Banga PNP si James. Sa pag follow up ko mga kapulisan, na recover sa natabuan kung insidente rong empty shell ag sangka bala it calbre 45, samtang rong baril hay uwa makita bangud nga suno sa suspek hay ana rayang pinilak. Magapangatubang man it kasong Homicide ro suspek matapos nga ana mang gin ako rong krimen.
