Makato, Aklan – Patay rong sangka eaeaki matapos nga gina alegar sumukoe sa mga pulis tag raya hay gin respondehan it mga pulis bangud sa pagpina eopok it baril kabii sa Brgy. Aglucay, Makato, Aklan.
Ro biktima nakilaea kay Cipriano Condez y Tiongson, sa legal nga edad ag residente man it nasambit nga barangay.
Sa blotter report it Makato PNP naga guwa nga nakabaton sanda it tawag halin kay Brgy. Kagawad Arnulfo Ureta nagapangayo it police assistance bangud sa may komusyon nga natabo ag may nabatian nga eopok it baril.
Insigida nga responde sa lugar ro mga Makato Police nga sanday PO3 Judie Bautista, PO3 Philip Glenn Locsin, PO3 Lonnel Bastp ag PO2 James Padasas ag sanda gin asistiran ni Kagawad Ureta sa lugar.
Pag abot sa lugar, na obserbahan rong ro biktima nga hilong ag naga sininggit nga anang gina ayat ro anang manghod nga si Junio Condez y Tiongson it inaway samtang armado it baril.
Nagpakilaea rong mga pulis ag gin negosyar nga kon pwede buhian ro anang baril pero imbis nga buhian anang tinutok sa mga pulis ag ginhana nga paeokpon nga nagtueod sa mga pulis nga manago.
Dugang pa gid nga samtang nagapaeapit ro biktima sa mga pulis hay sige ro anang pitik go gatilyo it baril. Dikara ro mga kapulisan nag disisyon nga imaw barilok sa batiis para nga indi eon makapaeapit sa mga pulis hasta nga matumba.
Samtang tumba eon ro biktima ag duguan hay sigidas gihapon ro anang pitik ko gatilyo it baril.
Ginsinggitan pa imaw ni PO2 Padasas nga “ Tama eon don nong” ag para buhian ro anang baril ag dayon nga ginbooe ni PO2 Padasas rong baril samtang ro ibang kaibahan hay nag apply it first aid sa biktima ag gindaea sa hospital.
Ginbawian mat-a it huean nga kabuhi ro bikitma samtang ginabueong sa Aklan Provincial Hospital.
Narecover sa crime scene rong sangka 357 revolver, nga loaded it sangka 1 fired cartridge ag 5 live ammunitionkung sa siin rong tatlo hay may igo it firing pin kung sa siin nagapamatuod nga imaw naghana pa gid nga magpaeopok sa mga kapulisan.
Nasayuran pa gid it newsteam nga bago raya matabo hay may natabong pag inaway sa tunga nanda ni Junio Condez ko Sabado it gabii ag nakaangkon ro biktima it black eye ag mga lastro sa ueo.
Sa makaron padayon pa rong imbistigasyon it Makato PNP angot sa nasambit nga insidente.
