Davao City – Gisuportahan ni Lasang Barangay Captain Allan Simo-ag ang gibuhat nga lakang sa nasudnong gobyerno ug sa mga lokalidad nga strict quarantine control measures nagtinir sa lig-ong basehan aron ilisan ang kapin duha na ka bulan nga ECQ sa GCQ.
Katarungan ni Simo-ag, dili mamahimo nga magpabiling magpondo ug dili magdagan ang ekonomiya sa Pilipinas ug padayon nga walay trabaho ang minilyon ka mga Pilipino.
Giingon sa opisyal kinsa usa usab ka political science graduate, ang GCQ ug ECQ pareho mahinungdanon nga mga protocol diha sa pagpakgang sa pagkuyanap sa pandemic virus.
Busa pahimangno niini sa katawhan mao nga sundon ang mga guidelines sa GCQ sama sa pagsuot og facemask, paggamit og FM Pass, social distancing, paglikay sa tapok-tapok ug daghan pang uban.
Epektibo niadtong petsa 15 karong bulana, gipailawom na sa General Community Quarantine ang tibuok probinsiya sa North Cotabato gikan sa gahom sa Enhanced Community Quarantine.
Kini human nagdeklara og modified Enhanced Community Quarantine ang kaulohang Manila og GCQ sa ubang dapit sa Pilipinas ang nasudnong gobyerno, matud ni Governor Nancy Catamco.
Sumala ni Catamco, aduna nay pipila sa mga industriya kon mga negosyo sa probinsiya ang gi-tugtan nang makabalik sa operasyon human sa kapin duha ka bulan nga pagkasirado.
Si Davao Del Norte Governor Edwin Jubahib nagpagawas gilayon og executive order aron ipaubos na ang probinsiya sa general community quarantine gikan sa Enhanced Community Quarantine.
Dinhi usab nanukad si Island Garden City of Samal Mayor Al David Uy aron ipaubos ang tibuok isla sa GCQ gikan sa ECQ ug tungod ani ang pipila ka industriya nangabli ug nakasugod na sa ilang operasyon.
Gibutyag ni Uy, mas iya pang gipahugtan ang mga guidelines kon protocols sa GCQ sama sa pagsuot og facemask kon mugawas sa balay, social distancing, ug uban pa batok sa pagkanat sa COVID-19.
RadyoMaN Joel Viray
