Goa, Camarines Sur–“Mawot ko na an kada pamilya sa Partido may aki na maka-gradwar.”, ini an sinabi ni Arnie Fuentebella, aspirante para kongresista sa ika-apat na distrito kan Camarines Sur, katakod kan ginibong distribusyon kan educational assistance sa 344 na iskolar kan Partido State University (PSU) na resipiyentes kan FUENTEBELLA EDUCATIONAL ASSISTANCE & FINANCIAL ASSISTANCE PROGRAM (FEFAP) na pig kondocer sa PSU Gymnasium ngunyan na bulan.
An FEFAP ipigmukna ni Cong. Noli Fuentebella kan 1992 tangani na makatabang na magianan an mga magurang sa pagpa-eskwela kan saindang mga aki. An itinaong assistance nagrerepresentar kan alokasyon para sa 2nd Semester kan School Year 2018-2019.
An naunambitan na numero kan iskolar parte sana kan 555 na estudyantes hale sa mga banwaan sa Partido. Obheto kan FEFAP na mabawasan an mga kahaditan kan mga estudyantes asin saindang mga magurang sa gastosan arog kan pamasahe, school projects, arkila sa boarding house, asin iba pa.
Naglalaom an joven na Fuentebella na mas orog pang mapahiwas an pagheras kan programa sa mas dakul pang mga pamilya sa Partido sa paagi nin paglaan nin mas dakula pang pondo para digdi.
Magpoon kan ilunsar an programa, dakul nang estudyante an nakagradwar, nakahanap nin trabaho, asin nakatabang sa saindang pamilyang mapamaray ang antas kan pagbuhay.
# Baretang Asenso ni Arnie
