General Santos City—upat ang angol sa nahitabong pagbusikad sa usa ka granada sa may Purok Lower Acharon, Barangay Calumpang atubangan sa usa ka Video-k bar alas 11:00 ang takna sa gabie kagahapong adlawa.
Mga biktima nailhang silang si Alvin Gonato, 25, Driver sa Tricycle, residenti sa PI-3, Barangay North Gensan; Joene Penuela Jr., 30, tricycle driver, residenti sa San Lorenzo Ruiz, Barangay Apopong, Mervin Cabangan, 18, self employed, residenti sa Purok Labus, Barangay Fatima ug Ajirol Maslet, 25, residenti sa Purok Banisil, Barangay Tambler Gensan.
Sa inisyal nga imbistigasyon sa Police Station 5 sa pagpanguna ni Police Sr. Inspector Dominador Soliva, OIC Chief Of Police sa Police Station 5 nga kalit lang mibusikad ang usa ka eksplosibo ubos nga bahin sa usa ka tricycle nga usa ka Yamaha nga dunay plate no. MY6351.
Tungod sa pagbusikad, naigo ang mga biktima kansa anaa lang nagtindog duol sa maong tricycle. Gilayon man nga gidala ang mga nahisgutan sa ospital human nakaangkon ug minor nga mga samad sa nagkandaiyang parti sa lawas.
Sa karon padayon ang gihimong imbistigasyon sa otoridad kalabutan sa insidenti ug ginasuta pa ang motibo niini.
