Gibasura na sa House of Representative Electoral Tribunal kon HRET ang electoral protest nga gipasaka ni kanhi Councilor Ma. Lourdes Candy Darimbang batok ni Congressman Rolando Klarex Uy sa unang distrito sa Cagayan de Oro.
Kini basi sa desisyon sa kongreso niadtong Nobyembre 15 nga gipirmahan ni HRET Chairman Associate Justice Diosdaro Peralta.
Sa iyang 22 ka pahinang desisyon, gibasura ni Peralta ang electoral protest ni Darimbang sabay sa iyang pag-ingon nga pakyas si Darimbang sa pagpadayag sa iyang mga ebedensiya aron iyang ipamato-od nga gilimbongan siya sa election niadtong 2016.
Mahinomdoman nga niadtong Mayo 12, 2016, si Congressman Uy giproklamar sa city Board of Canvasser sa Comelec nga maoy midaog sa pagka congressman sa first district sa Cagayan de Oro human iyang nakuha ang boto nga mikabat sa 57,095 votes samtang 51,208 votes ang nakuha ni Darimbang.
Apan diskontento si Darimbang sa iyang nakuha nga boto busa iyang gi-protestahan ang kadaogan ni Uy.
Apan matud sa House of Representative Electoral Tribunal nga si Darimbang, napakyas pag-substantiate sa iyang protesta batok ni Uy busa ilang gibasura ang iyang electoral Protest.
