Roxas City, Capiz- Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 ang 49- anyos nga electrician nga nadakpan sa ginkasa nga drug buy bust operation sa Barangay Loctugan, Roxas City.
Natigayon nga marekober sa subject person nga nakilala kay Rodolfo Bengaura y Besa ang tatlo ka mga sachet sang ginapatihan shabu, P6,000 nga boodle money, 500 pesos nga drug buybust money kag isa ka unit sang cellphone.
Suno sa team leader sang Provincial Drug Enforcement Unit(PDEU) sang Capiz PPO nga si Police Captain Pedro Goldino Jocson, nagalab-ot sa 75, 000 pesos ang estimated street value sang narekober nga druga sa subject person.
Ang amu nga persona ang nahibaluan nga drug surrenderer sa Oplan Tokhang sang PNP kag ginakabig nga street level target.
Suno kay Jocson, padayon nila nga ginamonitor ang mga persona nga anay na nga naimbolbar sa illegal drug activities.
Ini matapos nga base sa mga pinakaulihi nga mga operasyon sang kapulisan, lunsay sa mga nagkaladakpan ang mga persona nga una na naarestar bangud sa pagtulak sang druga apang nakaguha lamang matapos nga mag-avail sa plea bargaining agreement.
