TACLOBAN CITY – Tikang na yana nga adlaw iton klase ha Elementarya ngan Sekondarya ha bug-os nga Pilipinas. Sanglit, andam na an Department of Education (DEPED) nga pasakbon ngan tagan hin hibaro an mga kabataan ha eskwelahan.
Pero may mga kag-anak la gihapon nga nababaraka han safety han ira anak ha sakob han eskwelahan.
Mayada man gud mga eskwelahan nga waray school guard nga magbabantay han mga kabataan nga gawas-sakob ha eskwelahan.
Ha interview han RMN Kan Dr. Nilo Eder, Deped Tacloban City Division Information Officer, yana nga tikang an iton klase, 63 nga eskwelahan ha syudad han Tacloban in mayada na school guard.
“Mayada na kita mga school guards, gintraining na ini hira. Ginmanduan gihapon han aton School Superintendent nga an aton mooe igprioritize an safety han mga kabataan.”
Ini nga pitad in para makasigurado han seguridad han mga kabataan ha eskwelahan.
Last year, mayada duha nga kabataan an nabiktima han budol-budol ha gawas han Rizal Central School ha Tacloban kun diin nakuha tikang ha mga bata an ira mga cellphone.
Pahimatngon han opisyal, an seguridad han mga bata ngan han eskwelahan in diri la kanan DEPED responsibilidad kundi pati han komunidad nga nasasakupan hini.
