BACOLOD CITY – Gina-intensify pa sang Emergnecy Operation Center (EOC) ang information dissemination agod madamo nga mga residente ang mahaylo nga magpabakuna kontra COVID-19.
Ini suno kay Dr. Chris Sorongon, deputy for medical sang EOC, matapos ginkilala sang DOH-6 ang ciudad sang Bacolod bilang pinaka-preparado nga local government unit sa Western Visayas sa COVID-19 vaccination plan.
Ginapabugal ni Dr. Sorongon ang mga hinimuan sang EOC kasunod sang pagkilala sang DOH-6 lakip diri ang pagpatigayon sang vaccination simulation sa Brgy. Villamonte nagligad sa diin ang Bacolod isa sa mga LGUs nga una nakapatigayon sini.
Sa karon, ginapabakod pa sang EOC ang awareness campaign sa mga kabarangagayan sa bulig man sang mga barangay officials, Sangguniang Kabataan, health workers kag Barangay Health Emergency Response Teams (BHERTS) agod madamo ang Bacolodnon nga mahaylo nga magapa-register kag magpabakuna.
Nahibaluan nga nagpre-order na ang city government sang 650,000 doses sang AstraZeneca vaccine nga ginapaabot pa sa masunod nga mga binulan. Luyag man ni Mayor VEelio Leonardia nga mabakunahan ang tanan nga eligible partikular na ang mga naga-edad 18-anyos pasaka.
[image: image.png]
