General Santos City—Patay ang usa ka gwardya nga giilang si Gerald Haben, hamtung ang panginadaron ug stay in security sa SAL fishing nga nahimutang sa Barangay Tambler human gipusil kini sa wala mailhing suspek nga nakasakay ug motorsiklo ala una sa hapon samtang sakay kini sa fish car nga iyahang gibantayan.
Sumala pa ni Ernesto Libuon ang driver sa nahisgutang fish car nga gikan sila sa fishport ug pa sulod na unta sa usa ka canning Factory sa Brgy Tambler sa dihang nakadungog kini ug buto, sa pagtuo nga ligid sa iyahang sakyanan ang mibuto mihunong kini ug didto misaka sa fish car ang usa sa mga suspek dayon siya gipaduko.
Didto na gipusil sa mga suspek ang biktima pila ka higayon nga hinungdan sa iyang kamatayon.
Gilayong misibat ang suspek human sa insidente sakay sa motorsiklong naghuwat kaniya.
Samtang daghan matud ang nagdumot sa biktima mao kini ang nahimong pagbutyag sa iyahang hinigugma nga si alyas Lyn-Lyn.
Sumala pa ni alyas Lynlyn, strikto matud pa ang iyahang uyab sa iyahang trabaho ug daghan na kini ug nadakpan ug nasitahan sa iyahang ginatrabahuan tungod usab sa ilahang binuhatan.
Dugang pagbutyag sa nahigutan nga wala man usay naingon kaniya ang nasangpit nga nakadawat kini ug bahad sa iyahang kinabuhi ayha kini gipusil.
Gikabutyag usab ni police major Richard Ybanez, hepe sa Police Station 5 nga sa karon padayon ang ilahang ginahimong imbistigasyon kabahin na sa motibo sa nasangpit nga pagpamusil.
