Patay ang isa ka estudyante, matapos nga tiruhon suno pa ang kaugalingon gamit ang 45 nga kalibre sang armas luthang sa Purok 4, Barangay Talisay, Lake Sebu, South Cotabato.
Ginkilala ang biktima kay Cyrus Yovero Fabrigar, 19 -anyos, single kag residente sang nasambit nga lugar.
Base sa ila imbestigasyon suno kay PSMsg. Roldan Apostol, imbestigador sang Lake Sebu MPS, alas 5:00 kahapon sang aga, Hulyo 16, 2021, nakit-an na lamang sang iya nga lolo ang biktima nga wala na sang kabuhi kag may igo sang bala sa iya ulo.
Suno kay Apostol base sa pahayag sang lolo sang biktima nga magluwas nga hipuson ang apo naobserbaran niya nga masami ini nagatinir sa iya kwarto, samtang nagahampang sang mobile legend.
Naggwa man sa ila imbestigasyon nga alas 5:00 sang hapon sang Hulyo 15 nakabati sang lupok sa nasambit nga lugar ang kaingod sang biktima, apang ginbalewala nila ini tungod ginaekspektar nila nga naglupok lang nga karito sang salakyan, matapos nga malapit lang sa dalan ang balay sang biktima.
May-angot sini, suno kay PSMsg. Apostol problema sa pamilya ang isa sa ginalantaw nila nga rason sa paghikog sang biktima.
Sa subong nagapadayon suno pa ang ila nga imbestigasyon sa kamatayon sang 19-anyos tungod wala nahibaluan sang lolo sini kon sa diin nagkuha sang armas luthang ang apo.
Pahanumdom naman ni PSMsg. Apostol sa tanan partikular na sa mga kabataan nga indi solusyon sa problema ang pagpakamatay.
