Davao City – Patay ang kanhi PNP member ug kasamtangan nga senior citizen President sa Barangay, Tanglad , Sta. Maria, Davao Occidental human pusila sa duha ka mga armado alas 11:20 sa kabuntagon.
Sa imbestigasyon sa Sta. Maria PNP, ang biktima mao si Epifanio Comabig, 64 anyos, ex PNP member, nagpuyo sa Sitio Sulok, Barangay, Tanglad, Sta. Maria, Davao Occidental.
Nasayran nga gikan sa meeting sa mga senior citizen ang biktima ug miangkas sa usa ka motorsiklo apan pag abot sa tungason nga bahin kalit lamang nga gipusil sa duha ka armadong lalake nga nag atang sa dalan.
Wala giapil sa mga suspek sa pagpusil ang driver sa motorsiklo rason nga nakadagan kini palayo sa crime scene ug nakapangayo og tabang.
Misibat gilayon ang mga suspek sakay sa laing motorsiklo samtang ang biktima daling gibugtu-an sa kinabuhi ug karon anaa na sa St. Peter Chapel sa Digos City.
Na-recover sa kapulisan ang 5 ka basiyo ug 3 ka balinis sa .45 kalibre nga pistula sa crime scene.
RadyoMaN Erin Lumosbog
