General Santos City–Gikakurat ni Gensan City mayor Ronnel Rivera ang nahimong privilege speech ni Gensan City Councilor Atty. Dominador Lagare Jr. Chairman sa Committee on Transportation sa syudad batok kang Legal Officer Atty. Arman Clarin.
Kini may kalabutan sa impormasyon nga nadawat sa konsehal nga matud pa muresign sa pwesto isip Legal Officer sa dakbayan si Atty. Clarin higayon nga maaprubahan ni Mayor Rivera ang multi-million nga kontrata nga gipropose sa kumpanyang Star 8.
Sumala sa mayor nga sa kasamtangan wala pa niya masayran gyud unsay kinatibuk-ang unod sa privilege Speech sa konsehal apan aduna na syay inisyal nga impormasyon sa mga gitumbok sa expose ni Kagawad Lagare.
Giangkon ni Gensan City Mayor Rivera nga iyang gipadala ngadto sa Davao si Atty. Clarin atol sa gihimong panagpulong sa LTFRB.
Apan hangtud sa kasamtangan wala pa napresentar ngadto kaniya ni Atty. Clarin ang iyang report unsay nasabutan sa maong meeting tungod sa kawad-on ug panahon.
Giangkon usab niini nga daan nang nagsulti ngadto kaniya si Atty. Clarin bahin sa proposal sa kumpanyang star 8 kansa tiggama ug E-jeep ug E-tricycle apan gihingusgan sa mayor nga kini proposal palang.
Dako usab ang paglaum ni Gensan City Mayor Rivera nga masulbad na ang bangi tali kang atty. Clarin ug Atty. Lagare.
Sumala pa nga dako ang mamahimong epekto sa syudad sa mga gibuhiang expose ni Lagare ug kini karon ang iyang paningkamutan kung kini adunay kamatuoran o tsismis lang.
Gipaniguro usab sa mayor nga ang syudad nagapaningkamot gyud nga masulusyonan na ang problema sa transportasyon sa dakbayan.
