Davao City – Giangkon ni Agdao District Barangay Lapu-Lapu Kapitan Romeo Evangelista nga hangtud karon wala pa makatilaw og dagkong sunog ang iyang barangay sukad milingkod kini isip kapitan di sama sa ubang mga barangay dili na maihap ang insidente sa mga sunog kansang miugdaw og daghang mga kabalayan ug mikutlo’g pipila ka kinabuhi sa mga residente.
Luyo niini, matud ni Kapitan Evangelista, hugot ang ilang pagpangandam ug pagplastar og mga programa nga pambatok sa mahitabong sunog kung dili man gayod malikayang mu-ulbo ang maong delubyo sa iyang barangay.
Segun ni Kapitan Evangelista nga karong tuiga giprayoridad niya ang pag-alokar og pundo nga pampalit og mini firetruck ug uban pang kagamitan sarang magamit sa pagresponde sa mga sakop sa barangay disaster panahon dunay mahitabong sunog sa ilang barangay.
Dugang sa Kapitan nga gipangitaan na usab nila og pamaagi pa-unsa malimpyohan gikan sa mga nakaharang nga mga traysikad, mga motorsiklo, ug uban pa nga nakaparking sa mga kalye sa ilang barangay nga aron ang mga firetruck dili makulgot ug makasulod gilayon sa dapit kung asa mahitabo ang sunog.
Aron malikayan ang sunog sa Barangay Lapu-Lapu niining Fire Prevention Month karong bulana, nakig-alayon na karon ang Barangay Council sa Davao Light aron sitahon ang mga residente nga ilegal nagtapot og linya sa silingan ug nga mabungkag na ang octopus line nga usa sa tinubdan sa sunog.
Apan supak ang maong barangay opisyal nga did-an ang katawhan sa pagpalit ug paggamit og butane sa adlaw-adlaw nilang pagluto sanglit sagad sa mga residente sa ilang barangay walay kapasidad makasu-porta og mintina sa paggamit og Liquified Petroleum Gas kun LPG tungod sa ilang kapobrehon.
RadyoMaN Joel Viray
