General Santos City–Duha ka mga anggulo karon ang ginatan-aw sa Kapulisan kalabutan sa nahitabong pagbusikad sa eksplosibo sa syudad sa Koronadal kagahapong adlawa.
Sumala ni Police Regional Office 12 director, Chief Superintendent Marcelo Morales nga usa niini mao ang diversionary tactics sa Grupong Bangsamoro Islamic Freedom Fighters kon BIFF human sa sunod-sunod nga operasyon sa Militar batok sa maong grupo.
Samtang usa niini ang posibling pagpanimalos sa maong grupo ngadto sa kapulisan human nga ubay-ubayng miyembro nila ang nasikop sa operatiba sa South Cotabato police office sa mga nakalabayng mga bulan.
Gikumperma usab ni General Morales nga Improvised Explosive Device ang mibusikad sa kilid sa Christ The King Cathedral nga gikasamad sa duha ka mga biktima nga silang si Dindo Zamora driver sa tricycle nga gibutangan ug IED ug Henerosa Sumargo.
Kumpermadong IED usab ang nakaplagang eksplosibo duol sa 747 Convenience Store nga nahimutang sa Gensan Drive, Barangay Zone 3, Koronadal. Nasayran nga nabantayon dayon sa gwardya sa maong tindahan, ang kakudahang butang mao nga gilayon niining gibutang sa safety nga lugar dayon mitawag sa kapulisan hinungdan nga wala nakabuto ang maong IED.
(Photo Credit to Rmn Koronadal)
