General Santos City–Magpadayon gihapon nga magdawatan ug sweldo ug uban pang benepisyo ang pulis nga si PO1 Arjay Benatero nga nakabase sa Traffic Management Unit (TMU) luyo pa man nga nabalhog kini karon sa prisohan.
Kahibaluan nga napriso si Benatero human kining maaresto sa PDEA Regional Office-12 niadtong nakalabayng semana tungod matud pa sa kalambigitan niini sa iligal nga droga.
Sumala ni Police Chief Inspector Davis Vincent Dulawan, Spokesperson sa Gensan City Police Office nga mintras wala pay desisyon sa hukmanan nga sad-an ang pulis, magpabilin kining inosente hinungdan nga padayon kining magdawat ug suhulan sa gobyerno.
Kahibaluan nga gawas sa kasong kriminal, mag-atubang usab si Benatero ug kasong administratibo nga posibleng mahimong hinungdan nga sya matanggal sa pagkapulis. (Jordan Britos)
