General Santos City—plano karon ni Police Chief Superintendent Ceddric Train nga hinabion ang mga konsehal sa syudad sa Gensan kabahin sa isyong pag deklara sa Sanguniang Panglungsod nga persona non grata kang Police Sr. Supt. Romeo Ruel Berango sa Gensan.
Sumala pa ni Gen. Train nga buot niyang klaruhon ngadto sa mga konsehal nganong ingon na nalang ang ilang pagsupak sa paglingkod ni Col. Berango isip City PNP Director sa syudad.
Ang gikaingong pagsuway matud pa ni Col. Berango sa mando ni Mayor Ronnel Rivera bahin sa pagpasara sa Small Town Lottery Outlet sa dakbayan dili tinuod tungod gihimo man ni Berango ang iyang tahas kalabutan niini.
Ang nahitabo lang nga nalangay ang pag implementar gumikan duna usay proseso nga gisunod ang operasyon sa pagpatuman sa mando sa mayor.
Luyo niini gibutyag ni General Train nga siya andam usab mangayo ug dispensa ngadto sa mga konsehal human nga wala sila nakampante sa performance ni Col. Berango. Positibo usab si Gen. Train nga maundang na ang isyu tali sa mga konsehal sa syudad ug kang Col. Berango. (Dave Silagan)
