Davao City – Arestado sa gilusad nga hot pursuit operation kagahapong adlawa ang suspek sa pagdunggab sa usa ka balut vendor nahitabo sa Roxas Ext. Brgy. Zone II, Digos City.
Balhug na sa Digos City Police Office si Carlito Cingco, hamtong ang edad, habal-habal driver nga taga-Barangay, Kiagot, Digos City kinsa nanunggab kang Juvelyn Tabanam, 32-anyos, minyo ug residente sa Purok Durian, Brgy. Soong, Digos City.
Kahinumdoman nga alas-9:10 sa buntag niadtong Nobyembre 12, nakiglalis ang suspek sanglit gi-basted kini sa gipanguyabang balut vendor diin miresulta sa pagpangdunggab niini sa biktima gamit ang kitchen knife.
Swerte nga naharangan sa biktima gamit ang iyang too nga braso ang aksyon sa suspek gani nakahiagom lamang kini og ginagmay nga samad.
Samtang sa pakighinabi sa DXDC RMN kang PO2 Ian Paul Araiz, imbestigador sa maong insidente, nipailawom na og inquest proceeding ang suspek ug gipasakahan og tukmang kaso.
RadyoMaN Jason Amisola
