CADIZ CITY, NEGROS OCCIDENTAL – Duha ka mga lalaki ang nabun-an sa isa ka baylihan sa Hacienda Bayabas Uno, Brgy. Daga, Cadiz City sa magkasunod lang nga inoras kahapon sang kaagahon.
Ang una nga biktima nakilala kay Joemarie Areglo, 24 anyos ang edad, soltero kag pumulyo sang Had. Bayabas 3, Brgy. Daga, samtang ang suspek naman ginkilala kay Victor Amoroso, pumuluyo man sang amo nga lugar.
Ginpahayag nga natabo ang insidente may mga la 1:45 kahapon sang kaagahon kon diin naigo sa iya tiyan ang biktima nga si Joemarie.
Samtang ang ikaduha naman nga biktima nakilala kay Jess Oplas, 24 anyos ang edad isa ka construction worker kag pumuluyo sang Had. Bayas Uno, Brgy. Daga, sang amo man nga ciudad.
Igo naman sa iya likod ang naangkon ni Oplas matapos ginbuno sang suspek nga ginkilala lang kay Alias Tilong.
Suno sa imbestigasyon sang pulis, sadtong Sabado ukon isa ka adlaw antes sang Fiesta sa ila lugar may ginpatigayon nga liga sang basketball.
Sa amo nga aktibidad may nagluntad nga indi pag-inintiendiahay sa tunga sang mga biktima kag suspek gani ini sila ang nag-dinumtanay.
Pagkagab-i sa sulod sang baylihan, didto gid kag nagsumalangay ang mga biktima kag suspek gani natabo ang amo nga pagbinun-anay./dyHB BACOLOD
