BACOLOD CITY – Ginpablotter sang tag-iya sang isa ka kalan-an ang iya customer matapos nga ini siya ang ginyawyaw kag ginhambalan sang mga malaw-ay nga tinaga kahapon sang aga sa Brgy. Taculing, Bacolod City.
Nakilala ang tagreklamo nga nagapatawag lang kay Jasmine, 41 anyos ang edad, kasado kag pumuluyo sang Purok Violeta, Brgy. Taculing, ciudad sang Bacolod.
Suno sa iya nga mga las 8:25 kahapon sang aga, nagsulod ang isa ka customer nga nakilala lamang kay “Bruce Lee” isa ka mekaniko sang isa ka Auto Shop sa Taculing Road sa iya kalan-an sa Purok Tapulanga, Brgy. Taculing.
Ginpahayag sini nga nakita niya nga nagsindi sang sigarilyo si Bruce Lee sa sulod sang kalan-an gani iya ini ginsaway kag ginhambalan nga sa gwa lang magpanigarilyo bangud madamo sang customer sa sulod.
Apang sang yara na sa gwa sang refreshment ang amo nga customer, hinali na lamang ini nga nagsinggitan sang mga mala-in nga tinaga kon diin iya ginhambalan ang complainant nga “kerida ka lang gid, dugay-dugay manira ka na lang kay wala na customer “ kag pila pa gid ka mga malain nga hambalanon.
Bangud sini, ginsiling niya nga nahuy-an siya rason nga iya ginpa blotter si Bruce Lee./dyHB BACOLOD
