BACOLOD CITY – Ginpa-blotter sang tag-iya sang isa ka lote si former Don Salvador Benedicto Mayor Atty. Joemax Ortiz, Task Kasanag Deputy Commander Jhon Chiong kag ang 30 ka iban pa nga mga tawo sa alegasyon nga ini sila ang illegal nga nagsulod sa property sang complainant kahapon sang aga sa Shopping Center, Brgy. Villamonte, Bacolod City.
Si Tyrone Co, 43 anyos ang edad, pumuluyo sang Rizal Mabini St., Brgy. 22, Bacolod City, pinaagi sa iya sikretarya nga si Myrna Lareza, 42 anyos ang edad, pumuluyo man sang amo nga lugar ang nagreklamo sa Police Station 4 batuk sa ila ni Ortiz, Chiong lakip na ang nakilala kay Bebot Martin, residente sang Lopez Jaena, Narra Streets, Shopping Center, Brgy. Villamonte nga nagsulod sa iya property nga wala sang permiso.
Wala labot sa tatlo, ginreklamo man ni Co ang kapin 30 ka iban pa gid nga mga tawo nga nagasuksok sang sibilyan nga bayo.
Suno sa report, may mga las 11:15 kahapon sang aga, sa lote nga ginapanag-iyahan sang complainant sa Lopez Jaena-Narra Streets, Shopping Center, Brgy. Villamonte, pilit nga nagsulod ang tatlo.
Base sa record, gintiklod sang mga ini ang security guard sang amo nga property kag ginpadlock ang gate.
Pahayag pa sang tag-iya nga sang ara na sa sulod sang iya lote, ginlibot sang grupo ni Ortiz ang area.
Wala pa nakahatag sang ila nga bersyon ang ginareklamo./dyHB BACOLOD
