BACOLOD CITY – Gin relieve ang 20 tanan ka mga police personnel sang Bacolod City Police Office nga may mga reklamo kag ara subong sa Regional Personnel Holding and Accounting Unit, RPHAU humalin pa sang May 31, 2018.
Sa press release nga ginpagwa sang BCPO, ginpahayag nga kabahin ini sang intensive internal cleansing sang Philippine National Police base sa guidance sang Chief PNP Oscar Albayalde angut sa internal reforms kag organization discipline.
Ginpahayag nga ang pag-relieve sini nga mga personnel ang parte sang Standard Operating Procedure (SOP) agud indi ma-impluwensyahan ang imbestigasyon nga ginapatigayon batuk sa ila sa diin pila sa mga kaso nila amu ang involvement sa illegal drugs, gambling kag mga reklamo tuhoy sa ila trabaho.
Ginapahanumdum sang PNP nga wala sini gina tolerate ang mga police nga nagapadayon sang ila malain nga hilikuton apesar sang padayon nga reminders.
Ang mga police nga may indi maayo nga performance ang iga-sanction man apang ang mga nagahimo sang kaayuhan kag exemplary performance ang pagakilalahon.
Angut sini, naga apelar karon ang Bacolod City Police Office sang suporta sang publiko pinaagi sa paghatag sang impormasyon angut sa mga illegal activities kag pagpang-abuso sang pila ka police personnel.
