KABANKALAN CITY, NEGROS OCCIDENTAL – Patay ang isa ka nagkandidato sa pagka barangay kagawad matapos nga ini siya ang gintiro sang apat ka armado nga mga kalalakihan kaina sang aga sa Sitio Calubihan, Brgy. Bantayan, Kabankalan City.
Nakilala ang biktima nga si Rodolfo Ambong, 48 anyos ang edad, kasado, pumuluyo sang Sitio Mamba-og, Brgy. Bantayan ka nagpadalagan kagawad sa bag-o lang natapos nga barangay election, apang wala ini nagdaug.
Suno sa pila ka naka-kita, may mga las 6:45 kaina sang aga, natabo ang insidente kon diin ang biktima ang gindulugan sang 4 ka armado nga mga lalaki kag hinali na lamang nga ginpaarakan sang luthang.
Ginpahayag nga matapos gintiro, nagsinggit ang mga suspek nga ini sila ang miembro sang New People’s Army.
Suno sa asawa nga si Rosemarie, ang bana ang isa ka anay detainee sa sulod sang lima ka tuig kag mga tatlo na katuig nga naka gwa sa prisohan bangud man sang kaso niya nga homicide kag karon naga-trabaho bilang security guard sa isa ka senior high school sa amu nga barangay sa sulod na sang duha ka tuig.
Nag-angkon sang madamo nga igo sa iya lawas si Ambong partikular sa iya ulo kag dughan nga amo ang gintunaan sang iya kamatayon.
Narecover sa scene of the crime ang 6 ka empty shell sang 9mm kag .45 calibre nga armas subong duha ka live ammunitions sang .45 calibre nga pusil.
Sa pagpangusisa sa utod sang biktima, si Rodolfo ang may touchscreen nga cellphone kag may bitbit ini nga mga P50,000 cash para ibakal sang abono apang nadula.
Sa karon padayon ang pursuit operation sang mga katapo sang Kabankalan City Police Station agud madakpan ang mga responsible nga nagtiro sa biktima./Mawie delos Santos photo/RMN
