General Santos City—Nagpatabang sa buhatan sa Police Station 4 ang usa ka lalaki nga giilang si Michael Zonio, 29 anyos, residenti sa Rogan Subdivision, Barangay Apopong, Gensan human kining gipabuthan ug pusil sa wala pa mailhing suspek sa area sa Hangar, Barangay Mabuhay, Gensan.
Sa sumbong sa biktima sa kapulisan nasayran nga alas 9:35 ang takna kagabie, gikan sa ilang balay padulong ang biktima sa gitrabahuan niini sa Barangay Mabuhay sakay sa iyang motorsiklo.
Apan pag abot sa Purok hangar, dunay lalaking nakamotorsiklo nga kalit miovertake ngadto kaniya. Pag abot sa unahaan mihunong ang suspek dayon siya gibabagan dungan sa pagbunlot ug pusil.
Sa kalisang midagan ang biktima sa kabalayan sa lugar, tungod niini misibat nalang ang suspek sa wala sayring direksyon.
Dugang pa sa biktima nga wala siya masayod unsay tuyo sa suspek ngadto kaniya. Iyang giklaro nga wala man syay kalaban ug labaw sa tanan wala man usab syay atraso.
Sa karon nagpadayon pa ang gihimong imbistigasyon sa kapulisan kalabutan sa insidenti.
