Kapin 13 ka tuig na nga nag-antos sa pagpanakit sa iyang bana ang asawang gipusil patay kagahapon sa buntag atol sa misa sa San Roque Parish Church sa Catarman, Camiguin.
Kini ang giklaro ni Catarman Mayor Nestor Jacot sa interview sa dxCC-RMN Cagayan de Oro.
Matud ni Mayor Jacot nga lakip siya sa nasakitan sa dihang nanggawas ang balita nga ang iyang empleyado sa Mayor’s Office nga si Ivy Dunay Linao ang nigawas nga maoy nangabit nga unta ang bana niini nga si Celmar Linao ang nangabit sa dugay nang panahon.
Gibutyag sa mayor nga nihawa ang asawa sa ilang balay sa Barangay Compol niadtong Disyembre kay dili na niini maantos ang ginahimong pagpanakit sa iyang bana sa 13 ka tuig.
Gidugang ni Mayor Jacot nga giasoy sa biktimang asawa nga dunay mga panahon nga kulatahon siya sa iyang bana, tionan sa armas, kutsilyo ug uban pang pagpanakit, gawas pa sa gihimong pagpangabit sa bana.
