General Santos City–Kumbinsido ang Glan PNP nga ang grupong NPA maoy suspek sa pagbusikad sa IED daplin sa dalan sa may Sitio Waay, Barangay Rio Del Pilar, Glan, Sarangani Province niadtong Sabado sa Kaadlawon.
Sumala ni Police Sr. Inspector Danilo Abayata, Deputy Chief Of Police sa Glan PNP nga bisan nagpadayon pa ang ilang imbistigasyon, sila nagtuo sa pahayag sa militar nga NPA maoy suspek sa roadside bombing sa Glan ingon man ang misunog sa duha ka ekwepo nga iyaha sa FFJJ Construction Company nga ga-operate sa Davao Occidental.
Dugang pagbutyag ni Police Sr. Inspector Abayata, Deputy Chief Of Police sa Glan Police Station nga base sa ilang inisyal nga imbistigasyon migula nga ayha nahitabo ang roadside bombing, duha ka tawo matud pa ang nakit-an sa mga residenti nga miadto sa lugar.
Gituohan nga ang maong mga tawo maoy responsabli sa pagbilin ug IED tungod sumala pa wala sila kaila niini.
Posible usab nga ang militar nga mirespondi sa nahitabong pagpanulong sa mga rebeldi sa usa ka construction site ug pagsunog sa duha ka mga ekwepo sa lugar maoy target sa mga suspek.
Human sa insidenti nanawagan si Police Sr. Inspector Abayata ngadto sa kumunidad nga makig-alayon sa kapulisan ug sa militar higayon duna silay makit-ang susamang mga tawo.
Sumala sa opisyal nga higayon dunay mga kadudahang tawo sa palibot, dili na angayang maglangay pa ang katawhan sanglit angayan lang nga ila kining ireport sa kapulisan.
Tumong aron nga mapugngan nga adunay mapagan nga sibilyan gumikan sa hinimuan sa mga rebelding grupo.
