Gipatawag ni Konsehal George Goking ang Chairman sa Trade and Commerce sa konseho ang Globe ug Smart aron ipa-explain ang Globe kabahin sa pagkawala sa ilang serbisyo niadtong miaging semana.
Matud ni Konsehal Goking, apil usab nga iyang giimbitahan si National Telecommunication Commission kon NTC Director Engr. Ted Buenavista, City Disaster Risk Reduction and Management Department kon CDRRMD, Oro Chamber ug uban pa.
Gibutyag sa Globe, nga aduna silay tulo ka major nga cable nga nagkonekta sa Mindanao padulong Cebu nga nangaputol niadtong higayona hinungdan sa kalit nga pagkawala sa ilang serbisyo.
Tungod niini, gihangyo ni Kon. Goking ang Globe ug ang NTC nga kung masubli man nga maputol ang linya sa Globe, automatic kini nga moadto sa Smart ug kung maputol usab ang linya sa Smart, automatic usab nga maka-communicate sa Globe.
Iya usab nga gihangyo ang nasangpit nga mga network nga magpagawas dayun og Emergency Broadcasting System kon E-B-S nga maoy ihatag sa mga radio ug TV stations aron kini nga mapahibalo sa katawhan.
