General Santos City–Human sa nahitabong engkwentro tali sa militar ug sa miyembro sa NPA sa boundary sa Barangay Katubao, Kiamba ug Barangay Lumasal, Maasim, Sarangani Province nga gikamatay sa tulo ka mga miyembro sa mga rebeldi, giawhag karon ni Sarangani Governor Steve Chiongbian Solon ang m ga miyembro sa maong grupo nga musurender nalang sa gobyerno.\
Sumala sa gobernador nga abli ang lokal nga panggamhanan sa probinsya alang sa pagtahan sa mga nahisgutan sa sabakan sa gobyerno.
Aduna matud pay programa ang national government ug ang local government unit ilawom sa Comprehensive Local Integration Program kon CLIP alang sa mga rebelding buot manginabuhing normal nga wala sa kaburikan.
Dugang pagbutyag ni Governor Solon nga daghan nang mga miyembro sa NPA nga nindot na ang kinabuhi sa kasamtangan.
Uban kanila aduna nay mga trabaho ug gani adunay pipila ka mga former rebel nga anaa na nag trabaho sa mga buhatan sa gobyerno. Samtang duna usab uban nga nahimo nang opisyal sa barangay .
