Giakusahan ni Misamis Oriental Governor Yevgeny Bambi Emano ang iyang kaatbang sa politika nga nagdaot sa iyang pangalan sa Gingoog City.
Sa press conference sa kapitolyo kagahapon sa buntag, gi-akusahan ni Emano si kanhi Vice Governor Julio Uy nga nagsugo sa dili mominus lima ka mga tawo ug nag-order sa pagkaon sa duha ka restaurant sa Gingoog City sa duha ka lain laing higayon niadtong pasko sa milabayng Disyembre.
Matud ni Emano nga mokabat sa kapin kon kulang 10-mil pesos ang gi-order nga pagkaon sa wala mailang suspect sa duha ka lain laing restaurant sa Gingoog.
“Nag-order sila ug pagka-on ug gigamit akong ngalan, di siempre, nagluto og pagkaon to nga restaurant, pagka hapit na maluto, milakaw ang mga suspect ug wala na magpakita” matud ni Emano.
Gibutyag ni Emano nga iyang nasayran ang maong hitabo kay ang management sa maong mga restaurant nanawaga kaniya kay naningil.
Matud ni Emano nga wala siya magsugo sa mga tawo sa pag-order sa pagkaon ug wala sukad sa iyang kinabuhi nga mokaon sa karenderya nga wala mobayad.
“Mag-advance pa man gani ko og bayad kon mokaon ko” matud ni Emano.
Sa iyang disclaimer kagahapon sa buntag, si Emano mi-ingon.
“Ang akong disclaimer ingon ani ka single, kon dunay molusod dinha unya mag-order, unya molakaw, posposi ninyo, bitaya, hikti ang liog, hikti ang tiil ug tawga ang polis” matud ni Emano.
Gibutyag ni Emano nga walay lain nga iyang gidudahan nga ang nagsugo sa maong mga suspect, iyang kaatbang sa politika.
Matud ni Emano, nga iyang gitoho-an nga desperado na ang iyang political opponent hinungdan nga naghimog hugaw nga paagi pagdaot sa iyang ngalan.
Apan sa iyang kabahin,
Gipahayag ni Nilo Abrogueña nga sa ilang panag sulti ni Uy gilimod sa kanhi gobernador ang pasangil ni Governor Emano.
Matud ni Abrogueña nga gibutyag ni Uy nga walay tawo nga iyang gisugo aron mag-order ug pagkaon sa Gingoog gamit ang ngalan ni Emano
Gibutyag ni Abroguena nga gi-challenge ni Uy si Emano nga ipagawas kadtong mga tawo nga nag-order sa pagkaon aron ilang maila kinsa kadtong maong mga suspect.
Gipasabot ni Uy nga ang pasangil ni Emano batok kaniya, mao lamang ang pagtabon sa tinood nga lakaw sa Misamis Oriental nga walay iyang nahimo sa unom ka tuig sa iyang pagka gobernador.
