Sarangani Province—Dili man apil ang Sarangani Province sa teritoryo sa Bangsamoro Autonomous Region subay sa na-aprobahan nga balaod sa BOL o Bangsamoro Organic Law apan nagpadayag sa makausa pa og hugot nga pagsuporta si Sarangani Governor Steve Chiongbian Solon sa BOL og nga unta uyunan matud pa sa kadaghanan ang plebisito nga mahitabo bulan sa Enero sunod tuig.
Segun sa gobernador, mas gikinahanglan ning panahuna nga tagaan og higayon ang BOL. Sigurado matud pa nga makahatag og malungtaron nga kalinaw og kalambuan sa Sarangani Province ang maayong pagpatuman unya sa BOL. Kagahapon, opisyal nang nagsugod ang kampanya alang sa ratipikasyon sa BOL.
Nagka-uyon sila Governor Solon og MILF Peace Implementing Panel Chairman Mohagher Iqbal nga dili usa ka religious exercise ang BOL kundili usa kini ka political exercise aron mahatag ang gihandum nga “self-determination” kon pag-ila nga adunay hiniusa nga Muslim community ang nasud.
Wala matud pa gipug-ngan ang kinsa mang Kristyano og Lumad nga buot mupuyo sa lugar nga sakop sa Bangsamoro Autonomous Region kung nakita niini nga nindot ang ilang kinabuhi kung didto sila manginabuhi. Samtang, mas munindot pa ang pagpatuman sa BOL kung uyunan usab sa kadaghanan ang Pederalismo nga giduso ni Pangulong Rodrigo Duterte tungod kay mao kini ang porma sa gobyerno nga mupalig-on pa sa kultura og tradisyon sa usa ka komunidad og muhatag og dakong pondo alang sa mga programa og proyekto sa katawhan.
