Daw indi sa gihapon makapati apang malipayon na ang masobra 20 ka mga estudyante sang BS Pharmacy sang Central Philippine University nga maka-graduate na gid man sila subong nga bulan sang Abril.
Ini ang ginpahayag ni alyas Kim, isa sa mga nasambit nga estudyante kadungan sang hugot nga pagpasalamat sa RMN Iloilo nga daku ang nabulig agud mapalab-ot ang ila kawsa kag mapamatian sang CPU Administration.
Suno kay Kim nga nakita na nila sa website sang CPU ang ila grade nga pasado na gani dayon na ang ila pagsaka sa stage sa graduation nga natalana sa Abril 23.
Una diri, nagpalab-ot sang reklamo sa RMN Iloilo ang masobra 20 ka mga estudyante matapos ginhatagan sang Singko (5.0) nga grade sang ila Instructor sa Clinical Pharmacy nga si Analie Serafino.
Matapos ang intervention sang CPU Administration, naguwa nga pasado ang nasambit nga mga estudyante kag wala na sang mangin sablag sa ila pag-gradwar.
