Nagahingyo ang grupo sang mga doktor sa ciudad sang Bacolod kag Negros Occidental sa mga pumuluyo nga indi na pagdugangan ang ila nga emotional burden samtang sila ang nagapakig-away sa Covid-19.
Ini ang hingyo ni Dr. Connie Rose Benjamin, presidente sang Philippine College of Physcians Negros Occidental kasunod sang pagpangayo sang interventions sang mga empleyado sang Riverside Medical Center kay Gov. Eugenio Jose “Bong” Lacson bangud sang ila gina-eksperyensiya nga diskriminasyon.
Suno kay Dr. Benjamin, indi tanan nga doktor, nurses kag personnel sang Riverside Medical Center ang na-expose sa una nga Covid-19 positive patient sa Bacolod kag ang mga na-expose gid man, ang ginpaidalom na sa quarantine.
Ginpasiguro man ni Dr. Benjamin nga antes pa man nakumpirmar nga positibo sa Covid-19 ang nasambit nga pasyente, ginbutang na ini sa isolation room.
Gani, importante suno diri nga indi sila pag i-discriminate kag pagpasakyon sa pampubliko nga salakyan, pasudlon sa mga shops kag indi pahalinon sa ila mga gina-arkilahan nga balay.
Suno kay Dr. Benjamin, magluwas sa pagkaon kag iban nga bulig nga ginahatag sa ila, kinahanglan man nila ang mental kag emotional support.
