Nagatambak karun ang hazardous wastes sang Corazon Locsin Montelibano Memorial Regional Hospital (CLMMRH) bangud sang problema sang ila kontraktor sa bag-o nga pagsulundan sang Department of Environment and Natural Resources (DENR).
Sa interview sang DYHB kay Dr. Julius Drilon, medical director sang CLMMRH, ginpalayag sini nga ang kontraktor nga nagakuha sang ila hazardous wastes ang gikan pa sa Cebu bangud wala sang anuman nga kompaniya sa Bacolod kag Negros Occidental nga may kaangay sini nga serbisyo.
Nagakadto pa sa Bacolod ang kontraktor agud kuhaon ang mga hazardous wastes sang regional hospital agud dal-on sa Cebu kag didto i-dispose, apang bangud sa bag-o nga mga pagsulundan sa karun nabudlayan na sa proseso ang kompaniya.
Suno kay Drilon, ginamando na karun sang DENR nga sa sulod sang 24-oras dapat ma-proseso na ang higko sang hospital apang mabudlay ini sa ila contractor nga nagagikan pa sa Cebu, ini ang rason nga nagatambak karun ang ila hazardous wastes.
Ginapasiguro naman ni Drilon nga indi na delikado ang nagatambak nila nga basura bangud nga gin-autoclave na ini ukon gin-decontaminate agud indi na delikado nga ihaboy sa waste disposal areas.
[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
