Temprano pa nga napangayo sang pasaylo kag paghangop gikan sa publiko ang Bacolod Traffic Authority Office – BTAO angot sa INCONVENIENCE nga mahimo mahatag sa mga pumuluyo samtang gina-saulog ang MassKara Festival.
Suno sa head sang BTAO- Lt. Col. Luisito Acebuche, ipatuman ang road closure, sumugod alas-4 sang hapon tubtob alas-4 sang kaagahon sa mga dalan sa palibot sang Bacolod City Public Plaza particular sa mga gina-pwestuhan sang kiosko.
Lakip diri ang Rizal-Gatuslao, Gatuslao-Gonzaga, San Juan-Gonzaga kag San Juan-Rizal.
Ang BTAO ang maga-assign sang kapin 70 ka mga traffic enforcers sa downtown area sumugod sa opening day – October 7.
Kapin sa 200 ka mga traffic enforcers ang iga-assign sa Lacson Tourism Strip para sa Electric MassKara sa October 25-27.
Sa bahin sang Lacson, ipatuman ang na-andan nga road closure, halin sa Cottage Road pakadtu sa BS Aquino Drive.
Samtang, kapin sa 80 naman ka mga traffic enforcers ang maga-bantay sa New Government Center -NGC.
Hugot man nga ipatuman ang truck ban sa circumferential area ilabi na kon may yara sang event sa NGC Area.
