Banga, Aklan — Kritikal makaron rong sitwasyon it sangka helper matapos nga sunggaban it motorsiklo samtang naga tabok sa national highway kung Brgy. Linabuan Sur, Banga, Aklan kabii.
Ro biktima nakilaea kay Dave Pongyan, 18-anyos, tubong Culasi, Antique ag helper sa sangka asinan ni certain Ligaya sa barangay Linabuan Sur.
Suno kay PO3 Mario Sistorias it Banga MPS nga kabii hay nakabaton sanda it report nga may natabong aksidente sa lugar ag insigida gin respondehan.
Sa imbestigasyon nanda naga guwa nga rayang biktima hay halin sa pihak nga parte it karsada ag nagapatabok eon kunta paadto sa anang naulian tag sinunggaban it motorsiklo nga gina maneho ni Ariel Inamarga, 24-anyos, residente it Brgy. Estancia ag may backrider nga si Franz Carlo Bartolome, 18-anyos ag residente mat-a it Brgy. Tinigao.
Si Pongyan hay nakaangkon it fatal nga lastro sa likod nga parte it anang ueo. Una imaw nga gindaea sa Panay Health Care Hospital ag ko ulihi gin transfer sa Aklan Provincial Hospital ag naka ambu bag sa makaron.
Samtang sanday Inamarga ag Bartolome hay naka angkon man it lastro sa sari-saring parte it eawas nga admit man sa Provincial Hospital.
Nasayuran nga sanday Inamarga ag Bartolome hay sakay it andang motorsiklo halin sa Poblacion Banga paadto it Poblacion Kalibo tag matabo rong aksidente ag una sa idaeom kung impluwensya it makahililong nga ilimnun.
(c) Mdrrmo Banga
