HUGOT nga gipasalamatan ni Bukidnon Provincial Medical Center (BMPC) chief of hospital Dr. Miguel Antonio C. Prantilla ang katukuran sa Hemodialysis Center diha sa BPMC alang sa mga pasyenti sa End Stage Renal Disease (ESRD).
Kagahapon gihimo ang Grand Opening & Blessing of Hemodialysis Center sa BPMC, syudad sa Malaybalay.
Sa interview sa RMN DXMB Malaybalay ngadto kang Dr. Prantilla nga dako kaayo kining tabang sa pamilyang nanginahanglan ug suporta gikan sa gobyerno nga sugod magamit karong adlawa-Abril 8, 2021.
Matud ni Dr. Prantilla nga mukabat sa (7) ka dialysis machine ang magamit kung asa ang BPMC mo-akomodar ug 42 patients matag semana; 24 alang sa regular session, 6 alang sa Hepa B reactive patients, 6 alang sa COVID-19 patients, ug 6 alang sa emergency/admitted patients.
Gidugang ni Dr. Prantilla nga ang mao nga hemodialysis center libre sa mga class D patients apan sa ubang class adunay katugbang nga minimum fee para sa ilang operation.
Nasayran nga ubay-ubay ang mga dialysis patients sa Bukidnon base sa statistics.
Nangayo usab ug pagsabot ang chief of hospital sa mga dili ma-satisfy sa ilang serbisyo tungod kay anaa pa sila karon sa stage of adjustment.
Natukod ang hemodialysis center pinaagi sa pag-abag sa DOH nga migahin ug ₱15-Million alang sa kontruksyon sa 1st floor, ₱10-Million usab ang gibubo sa Pangagamhanang Probinsyal alang sa 2nd floor ug ang kinahanglanon nga manpower ug operation and maintenance cost, samtang laing ₱10-Million nga pondo alang sa machines gikan sa opisina ni Senador Migz Zubiri.
