BACOLOD CITY – Kaso nga robbery extortion ginpasaka na sa suspek nga nagpangbiktima sang isa ka maestra sang nagligad nga bulan sang Nobyembre diri sa ciudad sang Bacolod.
Ginkilala ang suspek nga si Ted Lladoc, 38 anyos, isa ka maintenance crew sang isa ka restaurant diri sa Bacolod City.
Ang biktima naman amo ang isa ka 22-anyos nga maestra sa high school diri sa Bacolod.
Nagpadulong sa National Bureau of Investigation (NBI) ang amo nga maestra para i-reklamo si Lladoc nga ini ang nagapatigayon sang “sextortion” sa iya.
Base sa pagpangusisa sang NBI ang insidente nagsugod sadtong July 2018 kon diin ang cellphone sang nobyo sang biktima nga maestra ang nabilin sa isa ka bilasyunan sa Bago City.
Sa amo nga cellphone, may naka save nga apat ka video sa diin didto nakit-an ang maestra nga naga-uba.
Katapusan nga semana sang November 2018 may nabaton nga message ang biktima sa Facebook halin sa suspek nga nagapangayo sang P10 mil pesos kag “sexual favor” sa biktima.
Bangud sini, nagpangayo sang bulig ang maestra sa NBI kag sadtong December 3, 2018 sang aga, ginpatigayon ang entrapment batuk sa suspek sa isa food chain sa dalan Lacson.
Nadakpan sa entrapment ang suspek kag gilayon nga gindetain sa NBI apang bangud sang kulang sa mga dokumento ini ang temporaryo nga gin-release kag ginpatigayon ang regular filing sang kaso nga robbery extortion./ Graphics courtesy of medium.com
