General Santos City–Mas gipahugtan pa karon sa kapulisan ang pagbantay sa seguridad sa matag checkpoint sa Probinsiya Sa Sarangani. Tumong niini nga mabantayan ang si kinsa mang musulod sa lugar nga buot mohimo ug kasamok sa malinawon nga probinsiya.
Sigun pa ni Sarangani Provincial Director Police Colonel Michael Lebanan nga sa karun naka-alerto na ang tanang Police Station sa probinsiya sa Sarangani human nga gi-atake ang Datu Piang Maguindanao sa mga miyembro sa BIFF kung asa adunay nahitabong pinusilay tali sa maong grupo ug sa otoridad ug gisunog pa ang Police Patrol Car ingon man ang detachment sa kapulisan.
Dugang pa ni Col. Lebanan, nga tanang bahad sa seguridad sa Sarangani Province gikan sa mga rebeldeng grupo ang wala nila ginabalewala. Sanglit matud pa ila kining gihatagan ug pagtagad aron maseguro ang kahapsay ug kalinaw hilabina nga duna nay nahitabo kaniadto nga kagubot sa probinsiya nga hinimoan sa mga rebeldeng grupo. Gi-awhag usab sa opisyal ang katawhan nga tabangan sila pinaagi sa pagreport sa pinakaduol nga kwerpo sa kapulisan kung duna silay makit-an nga mga tawo nga kadudahan ug lihok nga moabot sa ilang mga lugar.
