KON ikaw makamatikod nga ang imong gimahal nga lalake magpakita og katingalahang lihok kon ikaw maghisgot kabahin sa laing tawo sa imung kinabuhi o panahon ikaw maghisgut sa mga plano sa kinabuhi nga wa siya maapil, kana timailhan nga siya naselos. Siya nahimong maangkunon kanimo ug ikaw wa’y alamag unsaon siya pagdala ug pagkontrol. Kini ang tips ug timailhan nga siya usa ka seloso nga tipo!
1. Dali nga masuko
Tanan nimong buhaton maorag makapalagot niya permi, bisan sa imong huna-huna wa ka magbuhat og butang nga makapalagot kaniya. Masuko largo sa mga simpling butang sama sa pakigkuyog og laag sa mga higalang babae o kon ikaw madugay pag-uli gikan sa trabaho. Di siya maminaw kon ikaw mopasabot ug mohatag sa imong katarungan.
2. Di mahimuot kon ikaw maghisgot og laing butang
Kon ikaw makabantay sa panahong ikaw naghikabhikab paghisgot sa laing tawo, siya klarong wala malipay ug di komportable. Di kini magpili kon lalake o babaye apan mas grabe kini kon lalake ang imong hisgutan. Sama sa paghisgut kon unsa ka maayo sa maong tawo , unsa ang gibuhat niini, o kon unsa kini makahatag og lingaw kanimo, ma babaye o lalake, masuko siya.
3. Maangkunon kanimo
Gusto ba siya permi makahibawo kon asa ka o kinsa imong kauban? Permi ba siyang manawag panahon ikaw nilakaw kauban imong mga higala? Mamugos sa pagkahibaw kon unsa kang orasa mahuman? Dili sayop ang pahibaw-on siya ug angay makahibaw siya kon asa ka padulong ug kinsa ang imong kauban.
4. Dili siya ganahang magpalitrato o adunay litrato sa karaang mga higala/kaila
Aduna ka bay mga libro ilawom sa higdaanan o mga online profile sa social networking sites nga adunay mga hulagway kauban ang imong ex boyfriends o karaang higala? Malain ba siya kon makakita niini? Gusto ba siyang ipa-delete kini? O nahimo ba kini ninyong away? Kon “Oo”, siguradong ikaw adunay uyab nga seloso.
5. Kon adunay gwapahan o modayeg sa imong kaanyag, malain ug mahiubos siya
Inay nga siya mahimong “proud” ug mapasalamaton kon adunay modayeg ug mag-ingong ikaw makabibihag ang kaanyag, siya masuko ug mapungot. Kini ang klase sa lalake nga angay palay-an!
Picture Source: Livestrong.com
(allwomenstalk.com/Josephine Kesia C. Castro)
