BASIN og nagkinahanglan ka og reminder (tungod kay matag usa kanato nanginahanglan niini), nga dili sayon ang pagpangita og kwarta.
Gisingotan kini, gikapoyan, anaa pa’y uban nga na-stress bag-o kini nakuha.
Unya ang kamatuoran karon, mahal na kaayo ang pamaliton (hello, INFLATION!).
Kasagaran usab kanato, maglisod og tipig o save ug dali ra kaayo mogasto hilabi na nga hinagoan ni nato.
Aron matabangan mo karong panahon sa lisod, mahal, ug halos tingbits (ting bitay) matag semana, ania ang practical tips nga gikategoriya sa tulo ka bahin: Food.
1. Hunonga ang junk food.
Wa lang ka nakamatikod apan gasto kaayo ning junkfood. Huna-hunaa lang kon pila ang magasto nimo sa junkfood matag adlaw aron kuno naay snacks. Dili lang kini delikado sa imong panglawas, apan hinay-hinayon kini paghubas sa imong bulsa. Bag-o ka mopalit anang dako nga bag sa chips, pangutan-a imong kaugalingon kon smart buy ba kini.
2. Kaon kauban ang higala kon magdine-out.
Aduna’y higayon nga ang pagkaon sa inyong cafeteria dili makagana og kaon, mao nang aduna’y higayon nga sa gawas ka mokaon. Ang pagkaon sa mga restaurant dili kaayo barato, mas maayo nga mag-invite ka’s imohang higala. Ang maayo ini kay naa kay ka share niya naa sad kay katunga sa bayrunon.
3. Pag-andam og pagkaon nga dalhon nimo’s imong trabahoan.
Kon magbawn ka dako kaayo ka og ma-save. Hinuon taas-taas og oras kini nga proseso, gikan sa pag-grocery ngadto sa pag-andam niini matag adlaw. Apan makurat nalang ka nga dako diay kag ma-save niini nga paagi. Ang kwarta nga unta imohang para palit og pagkaon sa inyong cafeteria or sa restaurant mamahimo kini nimong ma-savings.
4. Bisita sa merkado.
Mas barato ang utan ug karne sa public markets itandi sa grocery stores. Usa ning pagkaon nga gikinahanglan sa tawo matag adlaw mao nga kinahanglan nga naa kay lugar nga mapalitan nga maka-save ka. Mas presko usab ang utan ug karne sa merkado.
5. Minusi ang pagpalit og kape sa coffee shops.
Ang usa ka order sa kape sa usa ka ilado nga coffee shop, dako kini og gasto itandi kon ikaw mismo mag-brew sa kape o magkutaw. Huna-hunaa lang nga sa usa ka pakete sa ground coffee daghan na kag mainom ani itandi sa pagpalit og iced Americano. Nganong mopalit paman og mahal nga kape kon makahimo ra ka ani?
6. Say no to fastfood.
Gawas nga dili maayo sa panglawas ang fast food, di pud ni maayo sa imong bulsa. Makasabot ta nga daghan ang ganahan sa fast food tungod kay dali kini apan mao kini ang labing bati nga klase sa pagkaon nga mapalit nimo sa imong kwarta. Kon di malikayan, ayaw permintiha, mas healthy nga pagkaon kan-a.
7. Kaon sa carenderia.
Kining carenderias mao ni ang pinakaduol nga pagkaon sa mga sud-an nga homemade niya sakto ra pa gyud ang presyo. Kaon mo’s carenderia kay gawas sa inato, barato.
8. Pagpatubo og kaugalingon nimo nga utanon.
Ang pagtanom ug pagpatubo og utanon sa kaugalingon nimo nga tugkaran, mao ang labing maayo nga pamaagi nga maka-save niya makakaon og healthy. Sugod sa mga tanom susama sa kamunggay, alugbate, okra, talong, paliya.
Source: www.sunstar.com.ph
Image credit: sunstar.com.ph
