ANG dughan nga nasakitan tungod sa gugma makapamugna og grabe nga epekto sa kinabuhi. Makaapekto kini sa trabaho, pag-eskwela ug panaghigala.
Kadaghanan makasinati og kahuot sa dughan, kasakit sa tiyan ug way tarong nga katulog sa gabii.
Ania ang atong mga kasayuran nga mahimong makapahupay sa kasakit nga namugna gumikan sa gugma:
01. Hinumdomi nga nahigugma ka og tinuod. Kon ang relasyon wala magdugay, wala na
magpasabot nga di kini tinuod. Naa lang gyuy mga rason nga ang Ginuo lang ang nasayod.
02. Hinumdomi kanunay nga regalo ang gugma. Usa ang gugma sa labing dakong gasa
gikan sa Ginuo. Bisan sakit pa sa kataposan, kinahanglan lang gihapong magpasalamat sa
mga kaalam nga nakat-onan gikan niini.
03. Hinumdomi nga dunay hinungdan ang mga panghitabo. Natapos ang usa ka relasyon di
tungod kay sipyat kini, di sab himuong rason nga wa nagtinarong ang usa isip kapares. Sa
kinabuhi, kinahanglan lang gyud matagtamtam kon unsay angay makat-onan sa usa ka tawo.
04. Hatagan og importansya ang “karon”.Ayaw paghandom nga mabalik pa kon unsay naa
sa kagahapon. Hinumdomi nga lahi na ang karon ug kagahapon aron ikaw makahuna-huna
kon unsay maayong buhaton alang sa ugma damlag.
05. Putlon na ang komyunikasyon sa “ex”. Kon ikaw ganahan nga mohupay na ang kasakit
nga gibati o maka move-on, di angay nga ipadayon pa ang koneksyon sa usag-usa gumikan
kay makapalangay kini sa paghupay sa kasakit nga imong gibati. Focus lang sa imong
kaugalingon ug palibot aron ikaw magmalipayon.
06. Kinahanglan og suporta. Pakighinabi sa mga higala ug bisan kinsa sa imong pamilya
nga mabination ug maluluy-on. Mosulti ka kon unsa imong panginahanglanon aron ikaw
matabangan sa pagpaayo sa imong kaugalingon.
07. Pagkat-on og higugma sa kaugalingon. Buhaton kon unsay makapahalipay sa
kaugalingon. Tutokan kon unsay angay nga buhaton alang sa kaayuhan sa kaugmaon.
Paninguhaa nga mapakita sa ubang tawo nga angay kita higugmaon sa maayo nga paagi.
08. Huna-hunaon nga may kataposan ang tanan. Kon sa pagkakaron ikaw galisod og
move-on, hinumdomi nga moabot ra ang tukmang panahon nga imo nalang kataw-an ang
kagahapon ug mi-agi.
Sources: www.sunstar.com.ph
(Rizza J. Jairi, CNU BA-Comm Intern.)
Image credit: nomadiclivingroom.com
