GIKUMPIRMA ni Acting Provincial Health Officer Dr. Gary Guido C. Tabios, Medical Officer III sa Provincial Health Office ang ika-upat nga kaso nga nag positibo sa COVID-19 sa probinsya sa Bukidnon.
Ang maong pasyente usa ka lalaki, nag edad og 35 anyos og lumolupyo sa lungsod sa Don Carlos, Bukidnon. Kini usa ka Overseas Filipino Worker nga direktang mibyahe gikan sa Saudi Arabia og miabot sa Pilipinas niadtong Mayo 23 og napahigayon gidayun sa swab test sa Ninoy Aquino International Airport o NAIA.
Niadtong Mayo 26, 2020 migawas ang resulta nga siya nag negatibo sa maong sakit.
Tungod sa bag-ong kunpirmasyon sa COVID-19 nga diin nag-positibo ang iyang kauban sa trabaho, subling gipahigayon ang swab test niadtong nilabay’ng adlaw, Lunes, Hunyo 1, 2020. Ug niadtong Myerkules, Hunyo 3, migawas ang iyang resulta nga diin gikumpirma nga kini siya nag positibo sa COVID-19.
Karong panahuna, ang maong nag positibong pasyente anaa karon sa isolation unit sa BPMC COVID Center.
Sa kasamtangan, giawhag ang tanang lumolupyo sa Probinsya sa Bukidnon sa pagpabilin sa ilang tagsa-tagsa ka panimalay og sundon ang bag-ong gipagula nga abiso gikan sa kagamhanang probinsyal lakip na ang mga giya og kamanduan gikan sa Department of Health sama sa social distancing, pirming pagtaud sa facemask labina sa pampublikong mga lugar, kanunay nga paghugas sa mga kamot og pabiling limpyo ang panglawas.
