LA CARLOTA CITY- Napuno sang tawo ang bilog nga plaza sang syudad sang La Carlota agud saksihan ang pagbukas sang ika-40 na nga pagcelebrate sang Pasalamat Festival.
Ginkalipay ni Mayor Luis Jalandoni III ang pagdugok sang madamo nga tawo sa una nga adlaw sang kahiwatan.
Samtang sa mensahe nga ginhatag ni Vice Governor Eugenio Jose ‘Bong’ Lacson iya ginkalipay nga sa nahauna nga kahigayunan nakakadto sya kag nangin dinapit nga humalambal sa isa sa pinaka bantog nga festival sang probinsya sang Negros Occidental.
Ginsabat naman ini ni Incoming Vice-Governor Jeffrey Ferrer nga ang pagkadto ni Lacson sa La Carlota panugod pa gid lamang bangud sa tagsa ka tuig sya na ang mangin dinapit nga bisita sa tagsa ka paghiwat sang Pasalamat Festival.
Nagpasalamat man si Ferrer kay Lacson bangud sya man ang nangin bisita sang syudad sang San Carlos sang naghiwat ini sang Pinta Flores festival.
Suno kay Ferrer nga isa gid lamang ang ila ginapabugal ni Lacson nga sadtong 2016 elections nga nangin magkasumpong sila bilang bise-gobernador wala ini sila naghaboy sang malain nga mga tinaga sa isa kag isa bangud sila mag abyan.
Bisan pa nga gatas kag kape sila nga duha sa kapitolyo bangud sa ila duag kun pananglitan magdaog si Lacson bilang Gobernador maga serbisyo sila sang maayo sa mga Negrense suno kay Ferrer.
Samtang daku naman ang Pasalamat ni Cong. Juliet Marie Ferrer sa mga opisyales sang syudad kag sa mga Barangay bangud sa padayon nga pagsuporta sini agud mapatahum pa gid ang mga palagwaon sa isa ka semana nga kahiwatan.
Nagtambong man sa kahiwatan si Mayor Joeben Alonso sang Pontevedra kag Board Member Joemar Alonso sang 4th District.
Nangin dinapit nga bisita si Ms. Regine Tolentino nga nag panguna sa zumba party matapos ang opening ceremony./ GRACE SUPE
