Natala sa Bukidnon ang ika-5 ug ika-6 nga kaso sa COVID-19.
Base sa Bukidnon COVID-19 Case Bulletin nga gipagawas sa Provincial Health Office nga as of June 6, 2020 alas 4 sa hapon, adunay 6 na ang kumpirmadong kaso sa COVID-19 sa Bukidnon.
Adunay 2 ka bag-ong kaso nga natala diin ang 1 niini sa Malaybalay samtang 1 usab sa lungsod sa Don Carlos.
Ang duha ka bag-ong kaso, susamang mga imported ug gipailawom na striktong isolation ug gihimo na usab ang contact tracing.
Sa Malaybalay, sa interview sa RMN ngadto kang City Health Office Dr. Dennis Sangalang gibutyag niini nga ang pinaka-unang kumpirmadong kaso sa COVID-19 sa siyudad usa kini ka 22 anyos nga lalaki nga taga Barangay Patpat ug gikan sa Manila nga niabot niadtong Hunyo 4 ning tuiga.
Sa karon anaa kini sa BPMC ug nagpabiling asymptomatic.
Nagpositibo siya sa rapid test pag-abot sa Bukidnon ug gipailawom sa confirmatory test ug nigawas ang resulta niadtong Sabado sa gabie nga nagpositibo sa COVID 19.
Matud ni Dr. Sangalang nga adunay gamay nga contact tracing ang ilang gihimo nga kadtong nakauban niya sa sakyanan gikan Cagayan de Oro City paingon sa Malaybalay.
Sigun niya nga usa lamang daw ang naka-uban ninii nga taga Malaybalay nga ila nang na contact traced ug karon gi-isolate na.
Giklaro usab sa City health officer nga wala naka-uli sa ilaha o kaha nakaadto sa komunidad maong wala kini angayang kabalak-an.
Samtang sa Don Carlos, Bukidnon, sa interview sa RMN gibutyag ni Roy de Asis ang executive secretary sa LGU Don Carlos nga ang ikaduhang kaso sa COVID-19 nga natala sa ilang lungsod usa ka locally istranded individual kon LSI nga gikan sa Manila.
Usa kini ka lalaki nga wala pa sila nasayud kung pila ang edad.
Wala usab kini naka-uli sa ilang lungsod ug karon anaa sa Bukidnon Provincial Medical Center kon BPMC gipailawom sa istriktong isolation.
