Patay ang usa ka notorious drug pusher atol sa Joint Drug Buy Bust Operation sa Upper Zone 3, Barangay Agusan ning syudad mga alas 11:20 kagabie.
Matud ni Chief Inspector Evan Viñas, Hepe sa Puerto Police Station nga ang suspek mao si Jovanie Nazareno, 30 anyos, alias Vanvan nga taga Barangay 35.
Gihimo sa kapulisan sa Puerto Police Station ang drug buy bust operation uban ang City Drug Enforcement Unit sa Cagayan de Oro City Police Office.
Gibutyag ni Viñas nga sa dihang naka matikod ang maong suspect nga police ang nagpalit kaniya ug illegal drugs iyang gipusil ang mga police operatives gamit ang iyang .45 Caliber pistol.
Apan matud ni Viñas nga suwerti kay walay naigo sa mga police gikan sa pusil sa maong suspek.
Kini ang rason nga mibalos ang mga police operatives ug ilang gipusil ang biktima ug na-igo kini sa duha ka bala sa iyang dughan nga maoy naghatud sa iyang kamatayon.
Matud ni Viñas nga ang maong suspek ila pang gidala sa Sabal Community Hospital sa Puerto apan gi-deklara ni Dr. April Balano nga dead on arrival.
Matud ni Viñas, nga unang nakuha gikan sa maong suspect ang suspected SHABU nga mokabat sa 0.050 grams silbing drug buy bust item ug 500 pesos nga drug buy bust money.
Sa Sabal Hospital, nakuha pa gayud sa bulsa sa maong suspek ang suspected SHABU nga mokabat sa 0.5 grams.
Didto sa Crime Scene, na-recover sa mga elemento sa SOCO nga gipangulohan ni Chief Inspector Christian Caballes ang usa ka 45 caliber pistol gikan sa maong suspek, duha ka fire cartridges sa .45 Caliber pistol ug tulo ka fired cartridges sa 9mm pistol.
Matud ni Viñas nga ang armas ug suspected SHABU nga nakuha gikan sa maong suspek ila nang gi-turn-over sa SOCO samtang ang patayng lawas ni Nazareno ang gidala na sa Everlasting Funeral Parlor sa Tagoloan, Misamis Oriental.
Si Nazareno, mao ang ika napulo sa mga drug pushers nga namatay sa drug buy bust operation sukad gilunsad sa COCPO ang ilang anti illegal drug Campaign.
