General Santos City—sikop sa operatiba sa Philippine Drug Enforcement Agency (PDEA) ang usa ka drug personality atol sa gihimong anti-narcotic operation niadtong nakalabayng adlaw sa Purok Pag-asa, Lambayong, Sultan Kudarat.
Giila ang suspek nga si Ricardo Gonzales y Oriel Alias Ricardo, 27, residenti sa Poblacion, Tantangan, South Cotabato.
Nasikop si Gonzales human kining napalitan ug (1) ka sachet sa gikatahapang shabu gamit ang P500.00 nga buy-bust money. Gawas niini nakuhaan pa ug laing (2) ka pakete sa gituohang shabu ang suspek.
Nasayran nga una nang buluntaryong misurender ngadto sa Tantangan Municipal Police Station ang suspek niadtong bulan sa Pebrero, 2017. Apan human sa pipila ka bulan, subli kining mibalik sa iligal niining gimbuhaton nga pagpamaligya ug iligal nga droga. Operasyon sa nahisgutan nagluntad sa Tupi, Tantangan ug sa Koronadal City.
Kasong pagsupak sa Section 5 (Sale of Dangerous Drugs) ug Section 11 (Possession of Dangerous Drugs),ilawom sa Article II sa R.A 9165 (Comprehensive Dangerous Drugs Act of 2002) ang gipasang-at nga kaso batok sa suspetsado.
